新手入坑 認識塊根植物 by Green Egg Store

最近兩三年,香港受到日本嘅種植文化影響,流行起塊根植物,咁其實塊根植物又係點玩㗎呢?一齊睇下日本嘅塊根文化,就知佢哋點樣玩得出神入化!




如果大家有睇開日本流行生活雜誌《BRUTUS》、《casa BRUTUS》,就會留意到過去有幾期<珍奇植物>特輯,介紹世界各地特別又罕見嘅植物,推動當地嘅種植文化,而形態獨特嘅塊根植物就深受日本人愛戴。



除咗種植愛好者,近年潮流界嘅人都玩埋一份,齊齊將植物結合時尚。其中日本品牌NEIGHBORHOOD主理人瀧澤伸介同invisible ink聯乘嘅一系列植木鉢,被視為植物界/時尚界潮人必備嘅收藏品(我食炒大㗎!)。所以玩植物講嘅已經唔止係植物本身,仲包括點樣去打理同配搭一盆盆栽。



睇返香港,INCREDIBLE早前就舉行咗個塊根x日本植木鉢品牌TOKY嘅展覽,令更多香港人認識塊根植物同日本花盆工藝;又有潮店432HZ 賣中指貓之餘,同時推出塊根植物,將植物、街頭文化融合一家;至於WOAWSTORE同PLANTS OF GODS 聯乘嘅盆景花盆,又係一個將種植品牌化嘅例子。



至於舊年開幕嘅White Whale Company x Green Egg Store 就結合咗古著同植物,除咗唔同嘅多肉、塊根植物外,仲有唔同類型嘅花盆同植物書籍,為大家帶嚟生活品味同植物融合嘅新體驗。



講咁耐,大家對塊根又有幾熟悉?不如同大家介紹一下新手入坑最受歡迎嘅品種!


Pachypodium rosulatum var. gracilius 象牙宮

又圓又肥嘅大肚腩上面伸出纖幼嘅枝葉,呢個反差萌就係象牙宮深受歡迎嘅原因之一!原產於非洲嘅馬達加斯加島,屬於夾竹桃科,象牙宮樹幹和分枝特厚,有儲水作用,種植時要盡量保持乾燥泥土。另外象牙宮適宜喺陽光充足嘅戶外生長,一般喺二月到五月嘅花期仲會開黃色嘅花仔。



Pachypodium brevicaule 惠比須笑

同樣係夾竹桃科的惠比須笑,原產馬達加斯加島,身體又係肥嘟嘟,春夏開滿綠葉,進入秋冬會開始落葉,甩晒葉之後望落成舊薑!玩塊根,點都要有舊薑看吓門口!花期由12月至第二年4月,亦係盛放黃色小花。



Dioscorea elephantipes 龜甲龍

龜甲龍算係香港人對塊根植物認識最深刻嘅代表,球莖爆開嘅裂紋就好似龜背紋理。無論係南非龜甲龍,定係墨西哥龜甲龍,都形態獨特、具有欣賞價值,所以深得種植者收藏。



想認識更多有關塊根植物的知識,呢本《All about CAUDEX》可以話係結合最完整的資訊同最靚嘅植物相,有哂品種名稱、植物特性、種植方式等等,有玩塊根嘅朋友都要有一本!



至於鍾意珍奇植物嘅朋友,《多肉植物Guidebook》就收納左好多唔同界別嘅植物,包括仙人掌科、景天科、塊根植物等等,有靚相又有詳細文字介紹,絕對值得入手!



0 views