《Sorry囉! 我剩係識去東京!》呢個page當然不是我開，但真的好有共嗚！去過日本咁多次，真的從未去過關西..適逢大台播放《周遊關西》，令我對大阪肉肉之旅更加期待！
今次大阪肉肉之旅，除了去大阪2個較多人認識的肉肉場，仲拜訪了大阪市內的植物店，今趟旅程真的十分滿足，4日既行程都是圍繞住植物而行，最幸福既係一行2人全程分別各自陶醉喺自己既植物世界，無一方覺得厭倦想先走，簡直是毒毒的至高境界！
DAY 2:
來到大阪第2日，我們一早出發到養庄園。由梅田出發，大概40分鐘車程，落車後行約13分鐘就到。(當日太熱，我地搭巴士9分鐘，落車行2分鐘就到。)
養庄園一共有4個溫室，分別係bb區、大人區、員工only區、綠植區。
其實bb區即是培養區，區內的株植都比較細小，屬幼株居多。但品種類別超多：景天、仙人掌、屁屁花、龍舌蘭、大戟、十二卷等等都應有盡有。因為是幼株，價錢都相對便宜。
bb區氣溫實在太高了，事不宜遲，立即到氣溫稍低的大人區睇下有咩正野。可能只是因為大人區有太多野睇，忘記了氣溫哈哈。大人區除了剛剛提到的景天、仙人掌、屁屁花、龍舌蘭、大戟、十二卷，還有烏羽玉、牡丹、兜、塊根等等。
呢個區雖然無bb區咁大，但勝在夠精，不同品種都有涉獵到，都是有幾盆到十盆不等，不像其他大棚一個品種一個貨櫃。
有一個烏羽玉區，都有不少選擇，更有好幾粒超大粒的翠冠玉！連側芽都大粒到可以分盆！
養庄園的烏羽玉算多選擇，不同大小、形態、顏色的魚魚都有，淨係望d魚都望左好耐。
旁邊亦有個塊根區，都是貴精不貴多，香港常見的象牙宮、惠比須笑、球腺蔓都不少；但是，日本買進口品真是好貴哈哈，就好似喺日本買歐洲牌子野一樣..
大人區內盆盆精品，地方細細但真係好好行！除了呢2個溫室，旁邊還有一個擺滿逸品的員工only溫室。因不方便拍照，就只好形容比大家聽，入面每一盆塊根植物，就好似我地喺日本既植物書上見到既咁形態萬千，每一盆都是園主悉心照顧的珍貴寶寶，欣賞過都覺得今生無悔了！
溫室外還有盆販售、空氣草區和景天小盆裁，都可以慢慢行。養庄園雖不是超級大棚，但我地都行左3個鐘，因為入面真係每盆植物都可以駐足好耐！
實用資訊：
浦部 養庄園
大阪府池田市木部町347-1
Tel 072-751-3813
Fax 072-753-3769
info@yoshoen.com
www.yoshoen.com/
～40mins ¥390
梅田駅[阪急宝塚線] - 川西能勢口駅 - 絹延橋駅 - 徒步13分
DAY 3:
大家唔好以為行3個鐘好crazy, 更crazy既係，我地去既第2個肉肉場，行左5個鐘！
大阪第3日行程，去左相信大家都比較熟悉的山城愛仙園。
愛仙園離市區不遠，由梅田出發，車程約30分鐘，落車後行約12分鐘就到。由於當日我地2個懶床懶到11點半先出到門口，所以早餐都未食就出發去到肉肉場，點知一行就5個鐘，直至6:00pm先返到梅田食早餐..
愛仙園比我地想像中大好好好多！(當日高溫亦都比我地想像中高好好好多！)
呢度既區域分仙人球、仙人柱、bb培養區、塊根、番杏、牡丹、無數景天..而每一個區望去都是一片汪洋..尤其是星球區，一路驚嘆一路行，一路呼叫：「好想全部帶返香港呀！」
番杏區又是一個令人不斷呼叫的地帶：「好得意呀！」隔離仲有bb培養區，鐘意邊粒就成盆拎去比老細抽出來。
塊根專區，呢度既塊根都算多選擇！size 黎講普遍都偏大隻，雖然價值不菲，但勝在性價比高，大隻之餘形態都是標準美人啊！呢度見到詢問度超高的象足西番蓮呀！
當日中午時我地去到肉肉場，猛烈既太陽曬入溫室，室內溫度達到攝氏43度..大家真係要做好準備，自備水同乾糧(因為會行好耐)，同埋可以避開陽光猛烈+中午時間既時段。如果真係太熱，可以入室內抖抖，同老細吹下水；室內仲有個小房比客人稍作休息，飲下咖啡食粒糖補充一下體力。
呢度一個溫室接住一個溫室，好似 'Inception' 咁一層又一層咁走入去，走唔返出黎呀！太多野睇行到唔捨得走。最後因為太肚餓，唯有依依不捨咁同老細道別。(其實係人地要收工了，我地搞到人地ot左半個鐘 ごめんなさい🙇)
實用資訊：
山城愛仙園
〒561-0805 大阪府豊中市原田南1-10-7 ３階
TEL 06-6866-1953
FAX 06-6866-1962
開園日 ：土曜・日曜・祝祭日
開園時間：午前10時～午後5時
http://www.aisenen.com
～29mins ¥190
阪急梅田駅[阪急宝塚線] - 雲雀丘花屋敷各停 - 曾根(大阪) - 徒步12分鐘
最後，附上早餐照2張
Comments